Ọkụ Agbarikọọla Ebe A Na-Azụ Anụ Ụlọ N'Ukpo

Afrika
Typography
  • Smaller Small Medium Big Bigger
  • Default Helvetica Segoe Georgia Times

Ọ kpọtụrụ akpọtụ ma zụọ azụọ nso nso a n'Ukpo dị n'okpuru ọchịchị ime obodo Dunukọfịa nke steeti Anambra, dịka ajọ ọkụ ọgbụgba dabìdòrò ma gbarikọọ ebe a na-azụ anụ ụlọ, bụ 'Sunday Ezeaku Modern Integrated Agricultural Farm' dị na Ndiagụ-Isiekwulu.

Ya bụ ajọ ọkụ ọgbụgba ka e kwùrù na ọ gbarìkọrọ ụlọ nwere ọnụ ụlọ ise, nnukwu itè nchekwa mmiri, nnukwu igwe na-enye ọkụ, ihe e jiri anụ nri, ewu, ézì, nchì na ihe ndị ọzọ.

N'okwu ya bànyere nke ahụ, onye nwe ebe ahụ, bụ Maazị Sunday Ezeakụ, kọwàrà na ya na ndị ezinaụlọ ya adịlaarị na mbụ menyụọ ọkụ nke na-agbabụ n'ọhịa dị n'akụkụ be ya, mana ha amaghị na ya bụ ọkụ abànyelarị n'ụlọ anụ ya.

O kwùrù na ihe ọkụ mèrè n'ụlọ anụ ya, bụzị nke ha chọpụtàrà echi ya, mèzịrị ka o siere ya ike ịsọnyụ ọkụ ahụ, ya na ndị ezinaụlọ ya na ndị ọzọ gbataara ya ọsọ enyemaka ike, tupuu ndị ọrụ nsọnyụ ọkụ na ndị uwe ojii abịaruo ebe ahụ.

Maazị Ezeakụ, bụ onyeisi ọrụ oyibo n'oge gara aga, kọwara ya bụ ọkụ ọgbụgba dịka oke ihe ọdachi, ma rịọkwazie enyemaka ndị mmadụ na gọọmenti steeti ahụ, iji nyere ya aka ịkwụrụkwa chịm ọzọ n'ịzụ anụ ya, n'ihi na mmadụ anaghị adị mma ọ dàá ka ọ tọbirizie ebe ọ dara.