Top Stories

Grid List

Igbo sị na ọ bụrụ na a pịaghị ngwèrè ụtàrị, ọ naghị ama na ọ gbà ọtọ. Ka ọ dị taa, ndị uwe ojii steeti Anambra awakpòla ma nwụchikọọ mmadụ atọ a na-enyo enyò na ha bụ ndị ntọ.
Ọ bụ onye na-ahụ maka mmekọrịta ọhaneze na ndị uwe ojii na steeti ahụ, bụ Maazị Harụna Mọhammed mèrè ka ụwa mara nke a n'ozi ọ kụpụụrụ ndị nta akụkọ n'Awka, n'aha onyeisi uwe ojii na steeti ahụ, bụ Maazị John Abang.

Buusu sị na ọ bụ mmekọrịta ahụ bụ ụtọ nwanne, maka na ọ na-abụ e zùó n'ìzù, gbaa afa, a gbata obì ndị mmụọ. N'ịgbasò nke a, òtù jíkọtára ndị Gọvanọ ndịda-ọwụwa anyanwụ ala anyị, a mààrà na bekee dịka "South-East Governors Forum" enweela ọgbakọ nke mbụ na mbụ ha n'ime ahọ 2020, bụ ebe ha nọrọ wee tụkọọ arò ọnụ dịka ụmụnne, ma tinyekwa ọnụ n'okwu bànyere ihe dị iche iche na-eme na mpaghara ahụ.

Aka na-achị steeti Anambra nọrọ na mbido izu ụka a wee mee mmemme ikpughe ákàrà ngosi ọhụụ (bụ logo) na njirimara (bụ mascot) maka asọmpi egwuregwu otu jikọtara ndị uwe ojii n'ala Nigeria, nke ahọ 2020.

O kwòrò ekwò ma hịọ ahịọ n'ụlọụka 'Chapel of Redemption' nke mahadum Nnamdị Azikiwe dị n'Awka bụ isi obodo steeti Anambra, dịka ụka Angịlịkan na Dayọsiisi Awka kàrà ụkà idogharị ụmụnwaanyị dayọsiisi ahụ nsọ na ichenwò ha n'ihu Chineke ọzọ, nakwa ịtụ mmamma.

A kpọkuola ndị Igbo ka ha na-echekwaba ma na-akwàlite asụsụ na omenala ha, ka o wee ghara ịnwụ maọbụ fùó dịka ndị òtù mba ụwa bụ 'United Nations Educational, Scientific and Cultural Organization (UNESCO)' bùrù n'amụma n'ahọ 2012.

Aka na-achị steeti Anambra, bụ Gọvanọ Willie Obianọ ekwunwòóla ezi njikere ya ịkwàdò na ịkwàlìtekwù ọtụtụ ndị ntorobịa na ụmụnwaanyị steeti ahụ, site n'ime ka ha sòro n'ihe a na-eme n'ime ahọ abụọ fọdụụrụ ọchịchị ya na steeti ahụ.

Igbo sị na onye na-amụ iti ọkpọ buru ụzọ tie akpa aja tupu ọ chọwa onye ọ ga-etigbu. Ya were bụrụ ihe kọwara otu nwa amadị a, bụ Anthony Joshua, siri tichaa akpa àjà ma tigbue Andy Ruiz Jr, na asọmpi ha abụọ nwere.

Goolu abụọ sitere n'aka Victor Osimhen na goolu nke Alex Iwobi na Samuel Chukwueze nyere wetara Naijiria mmeri ha meriri mba Lesotho site na ọkpụ goolu anọ asatara abụọ na Ntozu maka Iko Mba Afrịka, AFCON, n'afọ 2021 nke otu L agbara ụbọchị ụka n'amaegwuregwu Maseru.

Okaibe, Naijiria, agbaala ọnyụpa na AFCON ndị erubeghị afọ iri abụọ na atọ na-aga n'ihu ugbua na Ijipt dịka ha na ndị mba Saụt Afrịka gbara onwe ha onye laba onye laba n'amaegwuregwu Al-Salam dị na Cairo, Ijipt, ụbọchị Fraịdee. Mpụtara asọmpi ahụ ezughị ime ka ha banye n'agba nke na-eso agba nke ikpeazụ.

Ugo Ukwu nke Naijiria nọrọ n'amaegwuregwu Godswill Akpabio dị na Uyo were gosi Uze Benin na ha ka na-amụ amụ n'ebe egwu bọọlụ dị. Ugo Ukwu jiri ọkpụ abụọ asatara nanị otu were merie Uze na asọmpi nke otu L maka ntozu nke iko Afrịka.

Dịka ọ na-ahịọ na mba Ijipt ebe AFCON ndị erubeghị afọ iri abụọ na atọ na-aga n'ihu ugbua, Naijiria jiri iwe were gosi mba Zambia na ọ bụ iti na-ama ụzọ akwụkwọ ka ha jiri ọkpụ atọ asatara otu si ha jido n'amaegwuregwu Al Salam na Cairo.

Dịka asọmpi maka ntozu AFCON na-ebiri ọkụ, otú egwu bọọlụ ala anyị, Ugo Ukwu, bụ ndị a na-eche na ha ga-ezukọta na Naijiria, ụbọchị taa bụ Mọndee iji were kwado maka asọmpi a iji sonye na AFCON 2021. Asọmpi mbụ nke otu B dị n'etiti Naijiria na ndị mba Benin Republic.

Igbo sị na omepùru nwa ogbenye na-emepùru chi ya; ma sịkwa na ọ bụ o jide o nye ka ọha mmụọ na ọha mmadụ na-ekwupùru. N'ịgbaso nke a, òtù ahụ jikọtara ndị onowu na steeti Anambra, bụ òtù a maara dịka 'Anambra State Council of Traditional Rulers' agbaarala ndị ụwa na-atụ n'ọnụ na steeti ahụ ekeresimeesi, site n'ikesà ọtụtụ ihe onyinye, nke gụnyere ego na akpa osikapa nyegara ha nà òtù ọrụ obi ebere ndị ọzọ dị iche iche sitere okpuru ọchịchị iri abụọ na otu nke steeti ahụ nàkwa mpụga ya.

Isi ọchịchị ụwe ojii ala anyị ekwela ndị Anambra nkwà ezi nchekwa na gburugburu niile nke steeti ahụ tupuu, mgbe a na-eme, nakwa mgbe e mèchara mmemme ekeresimeesi a.

Obodo dere jim jim ugbua n'ime obodo nsukka nke dị na Steeti Enugwu kamgbe ụbọchị Mọndee dịka otu onye ụkọchukwu ụka Katọlik, Malachy Asadu, bụ onye nke a chọrọ, o were bụrụ ndị ntọ akparala ya aka.

Agba nke abụọ nke atụmatụ Operation Kpochapụ, bụ nke a gbàpèrè nso-nso a site n'aka Gọvanọ Willie Obianọ na-achị steeti Anambra, ka na-aga n'ihu na-amịtawanye mkpụrụ ọma, ma na-adọtawanye ọtụtụ akụkọ ọgbụgba àmà dị iche iche.

Igbo sị na ọnụ anaghị ezu ike ma ọ bụrụ na ihe ọ na-ata agwụghị, ma sịkwa na ọ na-abụ a na-egbu ji awaị, ọ na-atọ ụtọ, a na-abachawanye ji. Ka ọ dị taa, ndị uwe ojii steeti Anambra akpụgharịala ndị a na-enyo ènyò na ha bụ ndị omekoome, dị iri asaa na otu n'ọnụ ọgụgụ, bụ ndị a nwụchikọrọ site na mpaghara ebe dị iche iche na steeti ahụ.

Mkpu akwa dàrànnọọ n'obodo Ụmụokpu dị n'ikpuru ọchịchị Awka South na steeti Anambra, dịka ọkụ ọgbụgba dabìdòrò ma gbaa otu nnukwu ụlọ pịa-pịa. Ya bụ oke ọkụ bụ nke a na-enyo ènyò na ọ bụ nsogbu sitere n'ọkụ latiriiki kpàtàrà ya, ma bụrụkwa nke gbara ya bụ ụlọ gwòògwòò, tinyere ọtụtụ ngwongwo dị n'me ya, nke gbúru nde kwùru nde Naịra.

Top Stories

Grid List

Dịka a nà-atụ anya na eluigwe nwèrè ike ibe ákwá nke mbụ ya n'ime ahọ a oge adịghị anya, anya mmiri ya ewee gbaa n'ụwa; a kpọkuola ma dụọ ụmụafọ steeti Anambra ka ha kwụsị iji ahịhịa asụchisi ọwà mmiri, maka ajọ ọnọdụ dị iche iche nke ahụ aghaghị iwèta.

Ndị obodo Ojoto dị n'okpuru ọchịchị 'Idemili South' agbapeela okporo ụzọ ọhụụ ha rụrụ, bụ nke na-azabụ okporo ụzọ St. Barnabas, ma bàgharịzie ya aha ka ọ bụrụzie okporo ụzọ "Eze Oranyelu''.

Ọ kpọtụrụ akpọtụ ma zụọ azụụ n'Ụkpọr bụ isi obodo okpuru ọchịchị Nnewi South na nso-nso a, dịka ndị obodo ahụ jiri óke ọñụ wee merùbe ụbọchị Ụkpọr nke ahọ 2019.